Үндістанда ДНҚ негізінде жасалған алғашқы коронавирус вакцинасы дайын
Үндістан билігі жаңа вакцинаны қолдануға рұқсат етті
Үндістанның Ғылым және технологиялар министрлігі ДНҚ негізінде жасалған әлемдегі алғашқы коронавирус вакцинасын ересектерге және 12 жастан асқан балаларға салуға болатынын мәлімдеді. Үндістанның Дәрі-дәрмектер жөніндегі (DCGI) бас бақылаушысы ZyCoV-D Zydus Cadila вакцинасын шұғыл қолдануға рұқсатын берді, деп хабарлайды India TV News Desk.
Үнді вакцинасы ІІІ клиникалық сынақтан өтіп, оған 28 мың ерікті қатысқан. Вакцина Үндістанның 50-ден астам орталығында ірі клиникалық сынақтан өткізілген.
Үндістанда Covishield (Serum Institute), Covaxin (Bharat Biotech), Sputnik V (Ресей), Moderna және Johnson and Johnson вакциналары (Америка) қолданылып келеді. Енді бұл екпелердің қатарына ZyCoV-D Zydus Cadila вакцинасы қосылды.
