Қасым-Жомарт Тоқаев православ қауымын Пасха мерекесімен құттықтады
Пасха дәстүрлері жұртты жасампаздыққа жетелейді
Мемлекет басшысы Қасым-Жомарт Тоқаев қазақстандықтарды Пасха мерекесімен құттықтады, деп хабарлайды Azattyq Ruhy.
Президент сөз басында бұл мейрам мейірімділік пен ізгіліктің көрінісі екенін атап өтті.
«Құрметті еліміздің православ қауымы! Баршаңызды Пасха мерекесімен құттықтаймын! Бұл мейрам – мейірімділік пен ізгіліктің көрінісі. Мереке кезінде діндар қауым зор қуанышқа кенеледі, болашағы жарқын боларына сенімі артады.
Жалпыұлттық мәдени кодымызбен берік сабақтасып жатқан Пасха дәстүрлері жұртты жасампаздыққа жетелейді. Сондай-ақ мұқтаж адамдарға көмектесуге, жақын жандарға жанашырлық танытуға шақырады», - деді Тоқаев.
Ол өз сөзінде Әділетті Қазақстанды құру мәселесін қозғап өтті.
«Православ қауымы қоғамда өзара түсіністік пен келісімді сақтауға, бірлік және тілеулестік сияқты басты құндылықтарды орнықтыруға зор үлес қосып келеді.
Біз халқымыздың қайсарлығы мен ынтымағының арқасында барлық қиындықты еңсереміз. Әділетті Қазақстанды құру үшін биік белестерді бағындыра береміз.
Баршаңызға зор денсаулық, бақ-береке және толағай табыс тілеймін!» - деді Мемлекет басшысы.
